சென்னை: தமிழ்நாட்டில் உள்ள ஊராட்சி ஒன்றிய தொடக்க மற்றும் நடுநிலைப் பள்ளிகளுக்கு நடப்பாண்டிலேயே 1,050 கோடி செலவில் 7,200 வகுப்பறைகள் கட்டுவதற்கு தமிழ்நாடு அரசு நிதி ஒதுக்கீடு செய்தது. அதில் தற்போது ரூ.240 கோடியில் கட்டடங்கள் கட்டுவதற்கு ஊரக வளர்ச்சி மற்றும் உள்ளாட்சித்துறை அனுமதி வழங்கி உள்ளது.
இது குறித்து ஊரக வளர்ச்சி மற்றும் உள்ளாட்சித்துறை செயலாளர் அமுதா வெளியிட்டுள்ள அரசாணையில், ஊராட்சி ஒன்றிய தொடக்க மற்றும் நடுநிலைப் பள்ளிகளுக்கு சுமார் ரூ.800 கோடி மதிப்பீட்டில் 6,000 புதிய வகுப்பறைகளும், உயர்நிலை மற்றும் மேல்நிலைப் பள்ளிகளில் சுமார் ரூ.280 கோடி மதிப்பீட்டில் 1,200 வகுப்பறைகளும் என மொத்தம் ரூ.1,050 கோடி மதிப்பீட்டில் 7,200 வகுப்பறைகள் நடப்பாண்டிலேயே கூடுதலாக கட்டப்படும் என முதலமைச்சர் மு.க.ஸ்டாலின் சட்டப்பேரவையில் அறிவித்தார்.
அதனை செயல்படுத்தும் வகையில், ஊராட்சி ஒன்றிய தொடக்க மற்றும் நடுநிலைப் பள்ளிகளுக்கு வகுப்பறைகள் கட்டுவதற்கு 800 கோடி நிதி தேவை என ஊரக வளர்ச்சித்துறை ஆணையர் கோரியுள்ளார். அதில் நடப்பாண்டில் 240 கோடி நிதி ஒதுக்கீடு செய்து அனுமதி அளிக்கப்படுகிறது என கூறியுள்ளார்.
2023-24 ஆம் ஆண்டில் மீதமுள்ள நிதி ஒதுக்கீடு செய்யப்படும். மேலும் மாவட்ட ஆட்சியர், மாவட்டக் கல்வி அலுலவர்கள் இணைந்து எந்த பள்ளிக்கு முன்னுரிமை அளிப்பது என்பதை முடிவு செய்வார்கள் என தெரிவித்துள்ளார்.
தமிழ்நாட்டில் உள்ள 21 ஆயிரத்து 136 ஊராட்சி ஒன்றிய தொடக்கப்பள்ளி, 6,502 ஊராட்சி ஒன்றிய நடுநிலைப் பள்ளிகளில் 58,835 வகுப்பறைகள் உள்ளன. அந்த பள்ளிகளின் வகுப்பறைக் கட்டடங்களை மேம்படுத்தப்பட வேண்டியும் நிலை உள்ளது.
ஆகையால் எந்த விதமான கட்டடங்களும் இல்லாத பள்ளிகளுக்கு வகுப்பறை கட்டுவதில் முன்னுரிமை அளிக்கப்பட வேண்டும். பழுதடைந்த கட்டடங்களை இடித்து விட்டதால் பாேதுமான கட்டடங்கள் இல்லாத பள்ளிகளில் வகுப்பறை கட்டுவதற்கு முன்னுரிமை அளிக்கப்பட வேண்டும் என கூறியுள்ளார்.
ஊராட்சி ஒன்றிய தொடக்க, நடுநிலைப் பள்ளிகளில் 8 வகுப்பறைகள் இருக்க வேண்டும். அதற்கு ஏற்ப அடுத்து கட்டடங்களை கட்டித்தர வேண்டும். மாணவர்கள் எண்ணிக்கைக்கு ஏற்ப கட்டடங்களை கட்டித்தர வேண்டும் என பள்ளிக்கல்வித்துறை தெரிவித்துள்ளது.
ஊரக வளர்ச்சித்துறை ஆணையர் அளிக்கும் வடிவமைப்பின் படி கட்டடங்களை கட்ட வேண்டும். இடத்திற்கு ஏற்ப சற்று மாற்றம் செய்துக் கொள்ளலாம். மேலும் கட்டடங்களின் உறுதித்தன்மை மாநில அளவில் கண்காணிக்கப்படும் எனவும் அவர் கூறியுள்ளார்.
இதையும் படிங்க: அரசுப்பள்ளி கழிவறையில் இறந்த நிலையில் கிடந்த பச்சிளம் ஆண் சிசு!
